Jemi në fazën e përmbylljes së pavarësisë së mbikëqyrur

Kryeministri Hashim Thaçi ka thënë se procesi i pavarësisë së mbikëqyrur po përmbyllet, ndërsa institucionet e Kosovës janë të gatshme të marrin të gjitha përgjegjësitë, përfshirë këtu edhe ato të luftës kundër korrupsionit.
“Jemi në fazën e rëndësishme të përmbylljes së procesit të pavarësisë së mbikëqyrur sipas planit të presidentit Ahtisaari. Tanimë institucionet e Kosovës janë forcuar dhe konsoliduar për t’i marrë të gjitha përgjegjësitë që u takojnë, për të ushtruar ligjshmërinë në gjithë territorin e Republikës së Kosovës, për të thelluar reformat demokratike qoftë në politikë, qoftë në legjislacion, qoftë në ekonomi”, ka thënë kryeministri në një intervistë për Zërin e Amerikës, duke shtuar se tashmë po hapet një kapitull i ri, kapitulli i integrimit të Kosovës në NATO dhe BE.

Kreu ekzekutivit ka thënë se Kosova është në prag të shpalljes së opinionit të shumëpritur të GJND-së, mirëpo, sipas tij, pavarësisht nga vendimi i gjykatës, për Kosovën do të ketë vetëm ecje përpara, do të ketë njohje të reja dhe do të ketë një afrim edhe më të madh për t’u integruar edhe në NATO edhe në BE, por edhe në OKB.

Thaçi ka ripërsëritur se do të do të vazhdojë të jetë “në ballë të luftës kundër të keqes”, ndaj të cilës do të jetë pa kompromis, duke qenë se të gjithë “janë të barabartë para ligjit” dhe “respektimi i plotë i ligjit është detyrë imediate e të gjithëve”.