Google rifreskon edhe shërbimin Google Docs

Së fundmi, Google ka bërë disa ndryshime në pakon e saj të Office, e cila është në dispozicion për të gjithë përdoruesit dhe të gjithë dokumentet.
Prej tani e tutje, kur ju krijoni një tabelë, vizatim, prezantim ose një tekst-dokument në Docs, ju do të jeni në gjendje të përdorni një ndërfaqe e cila i bashkon disa funksione të reja, në një vend.

Dy muaj më parë, Google paralajmëroi për disa funksione të reja për shërbimin e saj online, Google Docs. Përdoruesit kishin mundësinë e shikimit paraprak të rifreskimeve që janë bërë, të cilat përfshijnë komunikimin në grup (group-chat), vegla për bashkëpunim në kohë reale, dhe opsione tjera plotësisht të ri-dizajnuara.

Tani, sa herë që ju krijoni një dokument, ju do ta krijoni atë nga versioni i ri i Google Docs. Dokumentet e krijuara tashmë, të cilat kanë përdorur editorin e vjetër do të mbesin në të njëjtën ndërfaqe, ndërsa së shpejti ju do të mund t’i konvertoni të njëjtat në versionin e ri të Docs.