Institucionet e sigurisë, të gatshme për kompetencat

Kosova ka progres të theksuar në ndërtimin dhe zhvillimin e institucioneve të sigurisë dhe KFOR-i do të vazhdojë bartjen e kompetencave në fushën e sigurisë dhe mbrojtjes së monumenteve të trashëgimisë kulturore në Kosovë dhe në sigurimin e kufijve në Kosovë, ka vlerësuar sekretari i NATO-s, Anders Fogh Rasmunssen, në takimin me kryeministrin Hashim Thaçi në Bruksel.
Rasmunssen e ka vlerësuar situatën e sigurisë në Kosovë si stabile dhe ka përshëndetur progresin e arritur në këtë fushë, që sipas tij, ka mundësuar që të vazhdohet me reduktimin gradual të forcave të KFOR-it në Kosovë.

Ndërsa Thaçi ka vlerësuar se Kosova e mirëpret reduktimin e forcave të KFOR-it, sepse ky reduktim vjen si rezultat i rritjes së sigurisë dhe paqes në Kosovë. Ai ka theksuar se reduktimi nuk do të shkaktojë asnjë vakum në fushën e sigurisë, sepse institucionet kosovare të sigurisë janë të gatshme të marrin të gjitha kompetencat në fushën e sigurisë.

Temë e bisedës mes kryeministrit dhe sekretarit Rasmunssen kanë qenë edhe zhvillimet në veri të Kosovës, me ç’rast është vlerësuar se zhvillimet në këtë pjesë të Kosovës kanë filluar të shënojnë progres, ndërsa Thaçi ka kërkuar nga NATO një bashkëpunim edhe më të madh në luftimin e krimit të organizuar dhe kontrabandës në veri të Kosovës.

Kryeministri Hashim Thaçi ka përsëritur përkushtimin e Qeverisë së Kosovës për të ecur me hapa të shpejt në përmbushjen e të gjitha kritereve, që Kosova një ditë të bëhet pjesë e programit të NATO-s, Partneritet për Paqe.