Kërcënohet me vdekje për shkak të kartonit të kuq

Johanesburg, 20 qershor - “Po, kam pranuar kërcënim për vdekje, por ato nuk më kanë shqetësuar. Unë jam mysliman dhe e di që vetëm Zoti vendos se kush do të jetojë, e kush do të vdesë”, ka komentuar qetë futbollisti Sani Kaita, përjashtimi i të cilit ka ndikuar në humbjen e Nigerisë nga Greqia, transmetojnë agjencitë.

Mesfushori nigerian ka marrë kërcënime me vdekje. Arsye e kësaj është kartoni i kuq i
marrë gjatë ndeshjes së xhiros së dytë të grupit B në Botëror kundër Greqisë, të cilën kombëtarja e tij e humbi me 1:2, ani pse udhëhiqte me 1:0.

Futbollisti nigerian ka refuzuar të krahasojë këtë rast me atë të mbrojtësit kolumbian Andresa Escobar, i cili u vra pas kthimit në shtëpi në vitin 1994, për shkak të autogolit në përballjen me SHBA-në.