Arrestohet personi më i kërkuar i Xhamajkës

Policia në kryeqytetin e Xhamajkës, Kingston, është në gjendje të lartë gatishmërie pas arrestimit të njeriut më të kërkuar të ishullit, Christopher Dudus Coke.
Coke u arrestua në një pikë kontrolli të policisë në periferi të Kingstonit, të martën vonë. Ai kërkohej nga Shtetet e Bashkuara nën akuzat për trafikim të drogës dhe armëmbajtje.

Përpjekjet për ta arrestuar atë muajin e kaluar nxitën dhunë, në të cilën më shumë se 70 persona u vranë.

Komisioneri i policisë së Xhamajkës, Owen Ellington tha se zyrtarët e tij janë paralajmëruar për mundësinë e sulmeve ndëshkuese pas arrestimit të Coke.

"Dua t'i apeloj familjes, miqve dhe mbështetësve të Christopher Coke që të qëndrojnë të qetë dhe ta lejojnë zbatimin e ligjit. Unë gjithashtu dua t'i siguroj qytetarët e Xhamajkës se situata mbetet normale", tha Ellington. /BBC/