Reagimet e Thaçit ndaj kritikave të opozitës

Prishtinë, 25 qershor - Pas kritikave të shumta të deputetëve të opozitës që në fillim të seancës së sotme parlamentare, drejtuar Qeverisë së Kosovës për ngathtësi ndaj veriut të vendit dhe mosinformim të Kuvendit për bisedimet e mundshme Kosovë-Serbi, kryeministri Hashim Thaçi në fjalën e tij ka vlerësuar lartë angazhimin e qeverisë aktuale në vendosjen e rendit dhe ligjit edhe në veriun vendit dhe shpërbërjen e strukturave paralele në komunat e banuara me shumicë serbe.
Kreu u ekzekutivit, siç raportonete pak më parë RTV21, ka thënë se qasja e Qeverisë së Kosovës dhe autoriteteve ndërkombëtare është dhe do të mbetet vendosja e plotë e ligjshmërisë në atë pjesë të territorit të Kosovës, përmes zbatimit të plotë të dispozitave të presidentit Ahtisari dhe Kushtetutës së Republikës së Kosovës.
“Ne u kemi dhënë mbështetje të plotë të gjitha angazhimeve që ka bërë Policia e Kosovës, EULEX-it dhe KFOR-i, që të ndërmerren masa urgjente për t’u tejkaluar kjo gjendje jo e dëshirueshme në këtë pjesë të Kosovës, por ritheksoj se kjo është qeveria e parë që ka filluar të investojë në këtë pjesë të Republikës së Kosovës dhe ka një angazhim konkret dhe strategjik për veriun, për krijimin e komunës së re dhe gjithashtu mundësinë e organizmit të zgjedhjeve të lira dhe zgjedhjen e liderëve të rinjë legjitim edhe në atë pjesë të vendit”, ka bërë të ditur Thaçi.
Kreu i ekzekutivit ka vlerësuar se pas mbajtjes së suksesshme të zgjedhjeve të lira në Partesh, është hapur mundësia tjetër për të lëvizur në këtë drejtim.

Ai po ashtu ka thënë se Kosova është në proces shumë të mbarë për dialogun për liberalizmin të vizave dhe hapjen e perspektivës për marrëdhënie tregtare me BE-në dhe procesin e stabilizim asocimit, ndërsa ritheksoi se opinioni i GJND-së për statusin e Kosovës do të shënojë një etapë të re në konsolidimin e shtetit.
“Ne po e përmbyllim definitvisht procesin e pavarësisë së mbikëqyrur për Kosovën dhe po hapim një kapitull të ri, atë të integrimit në NATO dhe BE. Opinioni i GJND-së për statusin e Kosovës do të shënojë një etapë të re të konsolidimit të shtetit tonë, por edhe hapjen e perspektivës integruese euroatlantike”, ka shtuar ai.