Inskenon grabitjen e armatosur, përfundon në pranga

Pejë, 25 qershor - Një 33-vjeçar nga Zahaqi i Pejës i ka nxjerrë punë policisë. I prezantuar si i plaçkitur dhe i maltretuar nga persona të armatosur një ditë më pas, sipas korrespondentit të Koha.net, ka përfunduar në pranga si lajmërues i rrejshëm.
Zyrtari për shtyp i Policisë së Pejës, Zeqir Kelmendi, ka treguar se 33-vjeçari kishte dhënë lajm të rrejshëm për policinë, gjoja se rreth mesnatës të së mërkurës dy vetura ia kishin bllokuar rrugën dhe se më pas persona të armatosur dhe të maskuar ia kishin plaçkitur një shumë të madhe parash. “Sipas ‘viktimës’ plaçkitësit me pas
e kishin dërguar me një qese najloni në kokë në një vend të panjohur për të”, ka thënë Kelmendi, duke mos dashur ta bëjë të njohur identitetin e tij. Pas hetimeve të shumta policia ka vërtetuar se 33-vjeçari kishte inskenuar tërë ngjarjen pasi që kishte shpenzuar paratë dhe në këtë mënyrë përpiqej të arsyetohej
para familjes. “Me urdhër të prokurorit është vënë nën pranga si person i dyshuar për lajmërim të rrejshëm”, ka thënë Kelmendi.