Përkujtohet 66-vjetori i Masakrës së Çamërisë

Shënohet sot 66-vjetori i Masakrës së Çamërisë, e kryer ndaj popullsisë vendase shqiptare nga trupat e rregullta ushtarake greke të udhëhequra nga Napolon Zerva.
Komuniteti çam paralajmëron një marshim në orën 18:30, që do të nisë nga Varrezat e Kllogjerit deri në Qafë Botë.

Partia për Drejtësi dhe Unitet, përfaqësuesja e vetme e komunitetit çam në Kuvend, deklaron se marshimi do të nisë aty ku prehen 2,700 trupat e çamëve që ndërruan jetë gjatë rrugës për t’i shpëtuar gjenocidit dhe dhunës greke.

Në vitin 1944 popullsisë shqiptare në Çamëri iu konfiskuan pronat nga autoritetet greke, dhe u përzunë me dhunë nga shtëpitë e tyre shekullore.

Në 25 qershor 1944, forcat e udhëhequra nga Napolon Zerva ekzekutuan në mënyrë barbare 2 000 çamë brenda një nate në qytetin e Paramithisë, shumica gra dhe fëmijë.

Kjo ishte një nga masakrat më të egra të njohura në historinë e Ballkanit.

Shqiptarët e ardhur në atë kohë nga Çamëria në Republikën e Shqipërisë, u regjistruan këtu si nënshtetas shqiptarë, duke iu prerë edhe rruga për rikthimin në trojet e tyre. Edhe në ditët e sotme komunitetit çam i mohohet e drejta për të vizituar shtëpitë dhe pronat e tyre. Gjithashtu, shteti grek i mohon kësaj popullsie edhe ngritjen e përmendoreve në vendet ku janë kryer vrasjet e të parëve të tyre. /gazeta start/