Motoçiklistët nga Serbia, i nënshtrohen kontrollit në kufi

Vetëm pak ditë pasi serbët kishin hyrë me dhunë në pikën kufitare të Jarinjës, duke mos dashur të tregojnë dokumentet e identitetit të tyre, 900 motoristë qytetarë serbë kanë kaluar të shtunën pikën kufitare në veri të Kosovës, por kësaj radhe të gjithë ata i janë nënshtruar kontrollit nga Policia e Kosovës dhe ajo e EULEX-it.
Zëdhënësi i Policisë së Kosovës, Baki Kelani, ka theksuar se kontrolli i motoristëve serbë është bërë nga pjesëtarë të Policisë së Kosovës dhe asaj të EULEX-it dhe se nuk ka pasur asnjë problem deri më tani.

Ndërkaq, jo zyrtarisht mësohet se një grup prej 100 motoristësh serbë do të kalojnë në pjesën jugore, për të arritur në manifestimin në Gazimestan, ku serbët të hënën do të festojnë betejën e humbur të Kosovës.

“Policia e Kosovës ka kryer të gjitha përgatitjet për të ruajtur rendin dhe sigurinë me rastin e Ditës së Vidovdanit”, ka thënë Kelani.

Ndërsa të shtunën, ministri i Punëve të Brendshme të Kosovës, Bajram Rexhepi, ka paralajmëruar që askush nuk do të mund të hyjë në Kosovë pa u legjitimuar më parë. /rtv21/