PS krijon bord ekonomik

Në Partinë Socialiste është krijuar të shtunën bordi ekonomik, i cili do të merret me trajtimin e çështjeve ekonomike.
Kreu i PS-së, Edi Rama duke vlerësuar krijimin e strukturës së re ka deklaruar se bordi vjen në një moment kur ekonomia në vend është në mungesë të plotë transparence dhe kur qytetarët po ndjejnë përditë e më shumë rrënimin.

Sipas tij, ka mashtrim me shifrat zyrtare që deklarohen për rritjen ekonomike dhe të ardhurat, ndërkohë që monopolet në ekonomi janë vërtetë shqetësuese.

Në fjalën e tij, kreu i Këshillit Ekonomik në PS, Shkëlqim Cani theksoi se gjendja ekonomike është shumë e vështirë. Sipas tij ka rënë fitimi i bankave 10 herë, ndërsa është rritur numri i kredive të këqija.

Për mashtrim të shifrave të qeverisë trumbetuar për rritje ekonomike ka folur deputeti i PS-së, Ilir Beqja. Sipas tij INSTAT me të dhënat ekonomike që ka publikuar po dëshmon se po shpërdoron detyrën. "Çdo ditë e më shumë po mashtrohet me ekonominë", tha ai. /shekulli/