Pakoja-bombë u zbulua vetëm 17 minuta para shpërthimit

Policia britanike e anti-terrorit ka çmontuar vetëm 17 minuta para shpërthimit një nga bombat e dërguara nga Al Qaeda. Deklarata e ministrit të Brendshëm të Francës, Brice Hortefeux, u bë gjatë një debati në televizionin publik francez.
Ai tha se një nga dy pakot e dërguara nga Jemeni drejt Shteteve të Bashkuara ishte shumë afër shpërthimit. Bëhet fjalë për pakon e zbuluar në aeroplanin që gjendej në një aeroport britanik. Pakoja e dytë u zbulua në Dubai.

Nëse deklarata e ministrit francez është e saktë kjo do të thotë se teoria e disa ekspertëve të sigurisë se pakot-bomba kishin si synim të shpërthenin në aeroplan është e vërtetë, njofton agjencia AP. Autoritetet britanike dhe policia londineze nuk kanë pranuar të komentojnë për çështjet operacionale.