Qytetarët jashtë vendit mund të votojnë përmes postës

Komisioni Qendror i Zgjedhjeve i Republikës së Kosovës njoftoi se është duke u përgatitur për organizimin e zgjedhjeve për Kuvendin e Kosovës, e që do të mbahen më 12 dhjetor.
Në njoftimin e Komisionit Qendror Zgjedhor thuhet se mbështetur në Ligj, në Planin operacional për zgjedhjet, prej kësaj të premte fillon periudha e regjistrimit/aplikimit në kuadër të operacionit të votimit përmes postës.

“Të interesuarit, qytetarët e Republikës së Kosovës të cilët ndodhen jashtë vendit mund të aplikojnë për t’u regjistruar dhe për të votuar me postë”, thuhet në njoftim.

Për të plotësuar kushtet për votim jashtë Kosovës qytetarët duhet jenë mbi moshën 18 vjeçare në ditën e votimit, të jenë të regjistruar në Regjistrin civil të Kosovës/UNMIK-ut dhe të posedojnë dokumentin e identifikimit (DI) të Kosovës ose të UNMIK-ut.