Kobe Bryant - lojtari më i paguar në NBA

New York, 6 nëntor - "Super-formacioni" i Miami Heat ka dominuar skenën e NBA-së në katër muajt e fundit. Lojtarët më të mirë të basketbollit janë kritikuar që i kanë bashkuar forcat në një skuadër për të fituar titullin. Kritikat më të mëdha kanë shkuar në adresë të basketbollistit më të mirë të stinorit LeBron Jamesit. Ai ishte sulmuar edhe nga pronari i ish-skuadrës së tij, Clevelandit, Dan Gilbert.
James mund të fajësohet për shumë gjëra që kanë të bëjnë me kalimin e tij në Miami, por assesi nuk bënë të kritikohet për egoizëm. James dhe dy bashkëlojtarët e tij të rinj Dwyane Wade e Chris Bosh kanë hequr dorë nga milionat duke firmosur kontrata me Miamin. Ata janë detyruar të bëjnë këtë për shkak të kufizimit të buxhetit në skuadrat e NBA-së. James e Bosh këtë stinor do të fitojnë nga 14.5 milionë dollarë, derisa Wade 14 milion. Asnjëri nga këta tre nuk zë vend në 20 basketbollistët më të paguar në NBA.
Basketbollisti më i paguar në NBA këtë stinor është Kobe Bryant, sipas listës së publikuar nga revista "Forbes". Bryant vitin e kaluar udhëhoqi LA Lakersat drejt titullit të kampionit të NBA-së. Ai me Lakersat këtë stinor do të fitojë 24.8 milionë dollarë. Bryant në prill firmosi kontratë të re trevjeçare me Lakersat, ku çdo vit paga e tij do të rritet. Në stinorin 2013/2014 ai do të paguhet 30.5 milionë dollarë dhe do të jetë basketbollisti i parë që do të kalojë shifrën e 30 milionë dollarëve.
Bryant në listën e më të paguarve në NBA e ka kaluar Tracy McGradyn e New Yorkut që e kishte këtë epitet vitin e kaluar. Para McGradyt, Kevin Garnett i Bostonit kishte udhëhequr për tri vite në listën e më të paguarve.
Por, këtë vit gjërat qëndrojnë ndryshe. Befasi është se pozita e dytë në listën e lojtarëve më të paguar në NBA këtë edicion i takon Rashard Lewisit të Orlando Magic. Lewis në vitin 2007 kishte firmosur kontratë gjashtëvjeçare të vlefshme 118 milionë dollarë. Ai këtë edicion do të marrë 20.5 milionë dollarë.
Pozitat tre dhe katër u takojnë dy "veteranëve" të NBA-së, Garnettit e Tim Duncanit. Garnett do të fitojë 18.8 milionë dollarë, ndërsa Duncan 18.7 milionë.
Vendi i pestë është i rezervuar për Michael Reddin e Milwaukee Bucks që do të marrë 18.3 milionë dollarë.


Lista e dhjetë lojtarëve më të paguar në NBA

1. Kobe Bryant (LA Lakers) 24.8 milionë dollarë
2. Rashard Lewis (Orlando) 20.5 milionë
3. Kevin Garnett (Boston) 18.8 milionë
4. Tim Duncan (San Antonio) 18.7 milionë
5. Michael Redd (Milwaukee) 18.3 milionë
6. Pau Gasol (LA Lakers) 17.8 milionë
-. Andrei Kirilenko (Utah) 17.8 milionë
8. Gilbert Arenas (Washington) 17.7 milionë
- . Yao Ming (Houston) 17.7 milionë
10. Zach Randolph (Memphis) 17.3 milionë