Sulmi ndaj arbitrit ndërpret derbin në Gjakovë

Një mjet i fortë i hedhur nga shikuesit ka rënë mbi kokën e arbitrit anësor Edmond Zeqiri në minutën e 65-të, për t'i dhënë fund të parakohshëm derbit të javës së 15-të të Superligës në futboll në mes të Vëllaznimit dhe Prishtinës. Zeqiri për disa minuta ka mbetur i shtrirë në fushë, ndërsa pas incidentit nuk ka qenë në gjendje të tregojë se si ka rrjedhur ngjarja. Ndeshja Vëllaznimi - Prishtina është luajtur të dielën në Gjakovë para katër mijë shikuesve.
Pas goditjes së ndihmësit të tij, arbitri kryesor i takimit Muhedin Ferati ka ndërprerë takimin. Në momentin e ndërprerjes, Prishtina ishte në epërsi 2:0. Loja ka qenë shumë korrekte. Këtë e dëshmon fakti që Ferati ka treguar vetëm një karton të verdhë. Edhe trajnerët e dy ekipeve kanë pohuar se paraqitja në fushë ishte korrekte.
Skuadra e Trepçës ka dominuar kundër Ferizajt, por është dashur të presë fundin e takimit për të siguruar fitoren me rezultat 3:0. Për Trepçën nga një gol realizuan Fitim Llapashtica, Afrim Mziu dhe Elvis Osmani.
Ndërhyrja e lojtarëve të repartit mbrojtës të Drenicës ndaj kapitenit të Pejës Haxhi Zeka (37) ka shkaktuar penallti. Zeka nga 11 pika e dënimi më të rëndë mposhti portierin
drenicas Shoshollin. Shtatë minuta më vonë (44), Gashi i shërbyer nga Vokshi shënoi golin e dytë për Besën. Mysafirët, në pjesën e dytë ndonëse dominuan tërë kohën, kanë zbutur humbjen përmes një goli të shënuar nga Gecit prej penalltisë (56).
Në Merdar futbollistët e Hysit kanë filluar të këndellen pas humbjes kundër Prishtinës dhe barazimit me Drenicën. Në javën e 15-të Hysi ka shënuar fitore 4:1 kundër Trepçës ’89. për vendësit shënuan Prekopuca, Zhdrella dhe Zabërxha dy herë, kurse për mysafirët nga Mitrovica golashënues ishte Peci.