Mbështetje KQZ-së në organizimin e zgjedhjeve

Komisioni Qendror i Zgjedhjeve (KQZ), ka marrë premtime nga krerët e institucioneve ndërkombëtare dhe ambasadorët e vendeve të Quint-it se do ta ndihmojnë në aspektin e mbështetjes teknike, monitorimit dhe këshilldhënies gjatë zgjedhjeve të jashtëzakonshme.
Këto garanci KQZ-së ia kanë dhënë kreu i ICO-së, Pieter Feith dhe në emër të vendeve anëtare të Quinit, ambasadori i Shteteve të Bashkuara të Amerikës, Christopher Dell.

KQZ-ja ka mbledhur krerët më të lartë të institucioneve vendore e ndërkombëtare si dhe përfaqësuesve të partive politike për të diskutuar ecurinë e procesit përgatitor për zgjedhjet e 12 dhjetorit.

Ndërkohë edhe presidenti në detyrë i Kosovës, Jakup Krsaniqi u ka bërë thirrje partive politike që të luajnë një rol konstruktiv konform rregullave të sjelljes që procesi zgjedhor të kaloj mirë, dhe në këtë mënyrë ta ruajnë, siç ka thënë ai, shëndetin e demokracisë në Kosovë.

Ndërsa nikoqirja e këtij takimi, kryetarja e KQZ-së, Valdete Daka ka deklaruar se institucioni që drejton, ka marrë premtime nga krerët e vendit dhe ata ndërkombëtarë në Kosovë se do ta kenë gjithë mbështetjen e tyre në këtë proces zgjedhor.

“Kemi marrë premtime se do të kemi vëzhgues dhe se procesi zgjedhor do të ndihmohet në të gjitha format që kërkohen nga ne. Gjithashtu kemi kërkuar nga institucionet dhe partitë politike që ta përkrahin këtë proces, pasi në pjesën më të madhe varet nga partitë politike”.

KQZ-së i është kumtuar sot se procesin zgjedhor në anën teknike do ta mbështes misioni i OSBE-së në vend ndërsa vëzhgimin edhe këtë vit do ta bëjnë qindra vëzhgues të ENEMO-s.