Rikonfigurohen listat brenda KQZ-së

Prishtinë, 14 nëntor - PDK-ja dhe AAK-ja ende nuk i kanë bërë publike listat e tyre zgjedhore. Derisa kjo e fundit së paku e ka lëshuar një listë jozyrtare, Partia Demokratike vazhdon të ndërhyjë në listën të cilën e ka proceduar para dy ditësh në KQZ, shkruan sot gazeta Koha Ditore.
Sipas gazetës, Partia Demokratike e Kosovës dhe Aleanca për Ardhmërinë e Kosovës kanë mbetur të vetmet subjekte të mëdha politike që ende nuk kanë arritur t’i publikojnë listat me emrat e kandidatëve që do të garojnë në zgjedhjet e 12 dhjetorit për t’u bërë deputetë të ardhshëm të Kuvendit të Kosovës.
Për dallim prej tyre, Lidhja Demokratike e Kosovës, të paktën ia ka dalë që të shtunën t’u tregojnë votuesve potencialë se çfarë kapacitetesh intelektuale ofron në zgjedhjet e radhës.
Burime të gazetës brenda PDK-së kanë bërë të ditur se shtyrja e publikimit të listës së kandidatëve është duke ndodhur për shkak të “luftës së brendshme” mes aktivistëve të partisë për t’u ranguar në listë.
Në kushte anonimiteti një anëtar i lartë i PDK-së ka deklaruar se edhe gjatë ditës së shtunë ka pasur rikonfigurim të listës për shkak të pakënaqësive që janë shprehur nga disa degë të partisë.
“Degë të caktuara të partisë kanë kundërshtuar në mënyrë kategorike tendencën e qendrës për ta rrumbullakuar listën përfundimtare, duke përfshirë në të emra kandidatësh që nuk kanë dhënë ndonjë kontribut për partinë”, ka thënë anëtari i PDK-së.
Tensionet dhe pakënaqësitë më të mëdha, sipas tij, janë krijuar sidomos rreth figurave të reja që janë inkuadruar në PDK.
“Konkretisht ka pasur anëtarë të Kryesisë që nuk kanë pranuar që Berat Buzhala dhe Petrit Selimi të rangohen lart në listë, duke i lënë prapa njerëzit që kanë punuar me vite në parti”, ka thënë ai.