KFOR-i ka hapur Shtëpinë suedeze në Graçanicë

Prishtinë, 14 nëntor – Komandanti i KFOR-it në Kosovë, gjeneral majori Erhard Buhler, e ka hapur të shtunën Shtëpinë suedeze të ekipit të KFOR-it për monitorim dhe lidhje (Qendra LMT) në Graçanicë.

Me këtë rast, Buhler ka thënë se pjesëtarët e ekipit për monitorim dhe lidhje, gra dhe burra, bashkëpunojnë shumë ngushtë me banorët, realizojnë dhe mbajnë lidhje të përhershme ndërmjet KFOR-it dhe pushtetit lokal, si dhe të udhëheqjes dhe organizatave ndërkombëtare në nivel të komunave.

“Kryetarët e komunave dhe banorët e çdo komune kanë mundësinë që të bisedojnë me pjesëtarët e KFOR-it nëpërmjet Qendrës LMT”, ka thënë Buhler, duke shtuar se KFOR-i porosit dhe nxitë mbajtjen e dialogut të rregullt. Ndërsa qëllimi i LMT në esencë është që të matë pulsin e popullit, që të inkurajoj që lirshëm të bisedojnë për hallet e tyre me ushtarët, thuhet në komunikatën e KFOR-it të transmetuar nga mediet serbe.

Buhler ka deklaruar se është i bindur se kjo është një mënyrë efektive që të njihen me problemet dhe rreziqet e mundshme për qytetarët, dhe kjo në masë të madhe do të ndihmojë që situata të rënda paraprakisht të zgjidhen.

Qendra LMT në Graçanicë është në përgjegjësi të suedezëve, përbëhet nga 8 oficerë të gradave të ndryshme dhe mund të punojë 7 ditë në javë.