Mustafa sërish hedh poshtë mundësinë e koalicionit me PDK-në

Kryetari i Lidhjes Demokratike të Kosovës, Isa Mustafa, ka mohuar mundësinë e koalicionit me Partinë Demokratike të Kosovës, duke thënë se ai edhe më herët kishte qenë kundër një koalicioni të tillë.
Këto komente vijnë pasi anëtari i Këshillit të përgjithshëm të LDK-së, Fatmir Rexhepi, i cili është tërhequr nga LDK-ja, ka akuzuar Mustafën se e “ka privilegjuar klanin, i cili qysh tash është në koalicion me PDK-në”, duke thënë se prapa kreut të ri të partisë dhe lidershipit aktual të LDK-së fshihet koalicioni me PDK-në.

Duke u përgjigjur në pyetjen se ‘si mund të bëhen reforma me emra të njëjtë’, sipas RTV21, Mustafa tha se gjysma e Kryesisë së LDK-së janë emra të ri, ndërsa në listën e deputetëve janë përfshirë rreth 60 % emra tjerë që kanë hyrë për herë të parë dhe të cilët janë zgjedhur nga zgjedhjet e brendshme në LDK.