AAK: Programi ynë garanton mirëqenie dhe stabilitet social

Aleanca për Ardhmërinë e Kosovës është e përkushtuar për përmirësimin e mirëqenies së qytetarëve të Republikës së Kosovës- është thënë në konferencën për shtyp të Dr. Fatmire Mulhaxha-Kollçaku, kryesuese e Grupit punues për shëndetësi dhe politika sociale të AAK-së.
“Përkundër faktit se në qendër të vëmendjes kemi projektin politik dhe atë ekonomik, projektin social e konsiderojmë direkt të ndërlidhur me dy të parët dhe të kushtëzuar nga njëri-tjetri. Mbrojtja sociale dhe kohezioni social, të bazuara në modelin social evropian, në promovimin e standardeve të larta në këtë fushë, do të demonstrohen përmes një vizioni të qartë strategjik që ne e kemi për politikat sociale”, është thënë në konferencë.

AAK do të angazhohet në vazhdimësi në harmonizimin e legjislacionit tonë me atë evropian edhe në këtë fushë, dhe posa të krijohen parakushtet, “do të ratifikojmë dhe nënshkruajmë edhe konventat dhe marrëveshjet ekzistuese, si dhe ato që do të hartohen me qëllim të koordinimit të sigurimeve shoqërore me Bashkimin Evropian.

“Programi ynë synon hartimin dhe zbatimin e një strategjie të qartë, e cila garanton stabilitet social. Ulja e dukshme e përqindjes së varfërisë, parandalimi i saj dhe, në veçanti, zhdukja e varfërisë ekstreme, mbetet prioritet i rëndësishëm i AAK-së”, u tha më tej.