Beqaj: Kosovarët do të tentojnë të marrin pasaporta të Shqipërisë

Zyrtarë të qeverisë së Kosovës nuk kanë përjashtuar mundësinë që një numër i qytetarëve të Kosovës të synojnë pajisjen me pasaporta të Shqipërisë, pas hyrjes së kësaj të fundit në zonën Shengen.
Sipas BBC, ministri në largim i Integrimit Evropian, Besim Beqaj, ka thënë se historia ka treguar që pas liberalizimit të vizave me Serbinë, disa shqiptarë të Kosovës janë pajisur me pasaporta serbe dhe e njëjta tani mund të ndodhë edhe me Shqipërinë.

Ministri Beqaj thotë se ka pasur raste kur qytetarët e Kosovës kanë shkuar në Serbi dhe kanë bërë regjistrim fiktiv, duke marrë pasaporta serbe për të përfunduar kështu në vende të ndryshme të Bashkimit Evropian.

Pas vendimit të fundit për heqjen e vizave me Shqipërinë dhe Bosnjën, Kosova ka mbetur vendi i vetëm, qytetarët e të cilit nuk do të mund të udhëtojnë në zonën Shengen pa viza.

Ndërkohë, Komisioni Evropian ka paralajmëruar fillimin e shpejtë të dialogut me Kosovën për procesin e liberalizimit, duke e kushtëzuar atë me ri-integrimin e të zhvendosurve.