Ibrahim Rugova ende në listën e votuesve!

Të vdekurit “ftohen” të “votojnë”. Ndër ta është edhe ish-presidenti, tashmë i ndjerë, Ibrahim Rugova. Emri i tij figuron në listën e votuesve. Në listën zgjedhore të Komisionit Qendror të Zgjedhjeve, e cila u hoq nga faqja zyrtare e internetit, ishte shfaqur një person me emrin Ibrahim Rugova, i cili vdiq në vitin 2006. Të dhënat personale të personit me të njëjtin emër në listat zgjedhore janë të njëjta me ato të presidentit të ndjerë.
Në listën e votuesve ende figurojnë edhe artisti i ndjerë Muharrem Qena, Ipeshkvi Imzot Mark Sopi dhe basketbollisti Valon Begolli, njofton Koha.

Zyrtarë të Komisionit Qendror të Zgjedhjeve janë ankuar se mosraportimi në komuna për vdekjen e familjarëve vazhdon të mbetet problem. Listat mund të freskohen nga 22 deri më 26 nëntor.

Emri i Ibrahim Rugovës nuk kishte figuruar për zgjedhjet e nëntorit të 2009-ës. Por, ai ka qenë i pranishëm në lista për zgjedhjet e vitit 2007. Procedurat e raportimit për të vdekurin kërkojnë pagesën prej 20 eurosh për t’u siguruar se emri i familjarit të tyre është hequr.

Deri tani KQZ-ja nuk ka ofruar asnjë shpjegim pse emri i presidentit të parë, i vdekur rreth 4 vjet më parë, ndodhet në listë si votues potencial.