Windows Phone 7 bëhet me 3000 aplikacione

Microsoft ka thënë se platforma e saj mobile Windows Phone 7 ka arritur të grumbullojë më shumë se 15 mijë zhvillues të aplikacioneve, ndërsa kompania pretendon ta mbyll javën me 3000 aplikacione të publikuara në dyqanin e saj virtual.
Gjiganti amerikan i softuerit i cili tashmë është futur edhe në ujërat e industrisë mobile duhet të angazhohet mjaft shumë për ta zënë hapin me rivalët si Apple iOS apo Google Android, mirëpo 15 mijë zhvillues janë një garanci e mirë që kompania është duke u munduar shumë të marrë pjesë të rëndësishme të tregut.

Kur krahasohet me sistemet operative të Apple, atë iOS, ose me Android të kompanisë Google, Windows Phone 7 është platformë mjaft e re mobile, e cila ka qenë prezent në treg për vetëm disa javë.

Në ditët në vijim, do të jetë interesante të shihet se si do të zhvillohet platforma e Windows Phone 7, ndërsa një gjë është e sigurt – Microsoft është duke investuar shumë nga resurset e saj për ta zhvilluar këtë platformë, ndërkohë që krijon pengesa të reja për rivalët e saj direkt.