Fondacioni “Behgjet Pacolli” shpërndau ndihma në Shkodër

Të shtunën në Shkodër një vargan me ndihma humanitare i Fondacionit “Behgjet Pacolli” iu dorëzua autoriteteve lokale. Vargani prej katër kamionësh të tonazhit të rëndë, përmbante 100 tonë koncentrat ushqimor për bagëtinë.

Prefekti i Shkodrës, Maxhid Cungu, njëherësh kryetar i komisionit të emergjencave, e falënderoi përfaqësuesin e fondacionit,Rrahim Pacolli, për ndihmën e dhënë dhe e njohu atë me ecurinë e situatës në këtë rreth të prekur rëndë nga përmbytjet, dhe veçanërisht me gjendjen e bagëtisë në këtë qark, thuhet në një njoftim të këtij fondacioni.

“Ne vendosëm ta ndihmojmë popullin vëlla të Shqipërisë me rastin e vërshimeve. Për më shumë zoti Pacolli që ka lidhje shpirtërore me fshatin, duke ditur rëndësinë e kafshëve për një familje blegtorësh, duke ditur humbjet e rënda në bagëti dhe nevojat për ushqimin e tyre, vendosi të sillte këtë ngarkesë me koncentrat ushqimor”, ka thënë Pacolli.

Qarku i Shkodrës është nga qarqet më blegtoralë të vendit. Ai ka rreth pesë mijë lopë, të organizuar dhe në ferma të mëdha. Ndihmat u shpërndanë në disa fshatra, mes të cilëve Dajçi, komuna më e prekur për humbjet në bagëti dhe u vlerësua shumë në ceremoninë e organizuar me këtë rast.

Në takim merrnin pjesë autoritete lokale të qarkut të Shkodrës, kryetari i komunës së Lezhës, Viktor Tusha, komunë që e ka shpallur Behgjet Pacollin qytetar nderi vetëm para pak muajsh.