Zjarr në pikën doganore 31, një e lënduar

Mëngjesin e sotëm policia e Kosovës në Mitrovicë ka marrë informatën për një zjarr në objektin e shoqatave të sigurimeve të Kosovës dhe të një kontejneri për shërbime të shpedicionit, në pikën kufitare të portës 31, të Zubin Potokut.
Përmes një kumtese të lëshuar, policia ka vërë me dije se incidenti është regjistruar në ora 2:00 të mëngjesit të sotëm.

“Në bazë të raporteve të para policore të siguruara nga hetuesit policor mësohet se zjarri ka shkaktuar dëme materiale në objektet shoqatës së sigurimeve të Kosovës dhe të shërbimeve të shpedicionit ndërsa një punonjëse e shoqatës së sigurimeve, një 21 vjeçare, e përkatësisë etnike serbe, ka pësuar lëndime të lehta trupore, djegie në dorën e majtë”, thuhet në kumtesë.

Viktima e këtij incidenti, sipas policisë, me ndihmën e një automjeti të policisë së EULEX-it, është transportuar deri në shtëpinë e shëndetit në Zubin Potok, për trajtim të lëndimeve të pranuara në këtë rast.

“Hetuesit policor dhe teknikët e kriminalistikës nga drejtoria rajonale e Policisë në Mitrovicë, bashkërisht me hetuesit policor të Zubin Potokut dhe me asistimin e zyrtarëve të komponentës policore të EULEX-it, kanë ekzaminuar vendin e ngjarjes, ndërsa shkaktari i zjarrit mbetet ende i pa përcaktuar”, njofton më tej policia.

Një shpërthim sipas policisë ka ngjarë gjatë zjarrit por sipas hetimeve të para besohet se “bëhet fjalë për një bocë me gaz, e cila ishte në barakën e shoqatës së sigurimeve të Kosovës ndërsa kishte shpërthyer pasi ishte kapluar nga zjarri”.

Policia është duke zhvilluar hetime për të zbuluar shkaqet, motivet dhe rrethanat e paraqitura në rastin e regjistruar si “shkaktim i rrezikut të përgjithshëm”. /Zëri/