Berlusconi: Gadafi nuk e kontrollon më situatën në Libi

Romë, 26 shkurt – Lideri libian Gadafi duket sikur nuk e kontrollon më vendin e tij, tha sot kryeministri italian Silvio Berlusconi, i cili bën pjesë në mesin e miqve më të afërt me diktatorin Libisë.

“Para disa minutave mora raportet më të reja dhe duket sikur Gadafi nuk mban më kontrollin mbi Libinë”, tha Belusconi në një tubim politik në Romë, transmeton agjencia Reuters.

Sipas kryeministrit italian, i cili ishte mjaft i përmbajtur në reagime lidhur me dhunën në Libi, tha se kryengritja popullore në Afrikën veriore do të mund të sillte demokracinë dhe lirinë, por edhe të shkaktojë krijimin e qendrave të rrezikshme të fundamentalizmit islamik jo fort larg brigjeve të Evropës, si dhe eksod masiv të refugjatëve.