Flota e SHBA-së drejt Libisë, Gadafi ankohet në Perëndimin

Tripoli, Bruksel, 28 shkurt - Udhëheqësi i Libisë, Moamer Gadafi, i cili po përballet me kryengritje popullore, i ka akuzuar vendet e Perëndimit se e kanë braktisur qeverinë e tij në luftën kundër "terrorizmit".
"Jam i habitur, sepse ne kemi një aleancë me Perëndimin për të luftuar Al Qaedan, dhe tash kur ne po i luftojmë terroristët, ata na kanë braktisur", ka thënë Gadafi në një intervistë për televizionin amerikan ABC.
"Ndoshta ata duan ta pushtojnë Libinë", ka shtuar ai.
Gadafi e ka quajtur presidentin amerikan Barack Obama "njeri të mirë", por tha se duket se ai është keqinformuar mbi situatën në Libi.
Kryeministri David Cameroon tha se Britania do të punojë me aleatët në përgatitjet për zonën e ndalim-fluturimeve mbi Libi, për t'i mbrojtur njerëzit e saj nga sulmet e qeverisë së Gadafit.
Kryeministri i Australisë, Kevin Rudd tha se qeveria e tij do të kërkojë nga Kombet e Bashkuara që të miratojnë zonën e ndalim-fluturimeve.
Sidoqoftë, sekretari i përgjithshëm i NATO-s, Anders Fog Rasmusen u distancua nga bisedimet për zbatimin e menjëhershëm të një mase të tillë.
Ndërkohë, zëdhënësi i Pentagonit, koloneli Dave Lapan, tha se ushtria amerikane po i lëviz forcat detare dhe ajrore në pozicionet për rreth Libisë. Ai tha se ky hap do t'i jepte presidentit të SHBA-ve Barack Obama një varg opsionesh për krizën.