Nëse PDK s’e do Pacollin, AKR tërhiqet nga Qeveria

Pas vendimit të Gjykatë Kushtetuese ende është e paqartë se si do të veprohet për zgjedhjen e presidentit të Kosovës. AKR-ja për president të Kosovës do të ketë sërish Behgjet Pacollin, ndërsa nëse ky vendim nuk përmbushet nga PDK-ja, atëherë AKR-ja do ta shqyrtojë marrëveshjen për bashkëqeverisje.

Ibrahim Makolli, ushtrues detyre i kryetarit të AKR-së, ka thënë për AlbanianScreen se Behgjet Pacolli është kandidat jo vetëm i Koalicionit për Kosovë të Re, por njëkohësisht edhe pjesë e marrëveshjes se koalicionit mes partnerëve qeverisës.

“Z. Pacolli është i nominuar edhe nga të gjithë partnerët qeverisës, prandaj do të vazhdojë të jetë kandidat për president nga koalicioni qeverisës”, ka thënë Makolli, transmetoi Zëri.

Sipas tij, në rast se cila do pikë e kësaj marrëveshje vihet në pikëpyetje, atëherë AKR-ja, si subjekt politik, pjesë e koalicioni qeverisës, rezervon të drejtën për ta rishqyrtuar gjithë marrëveshjen e arritur për bashkëqeverisje me PDK-në.