Shala: Ambasadori Dell po takohet me problematikët

Nënkryetari i Aleancës për Ardhmërinë e Kosovës, Blerim Shala, ka thënë se deri më tash, ambasadori amerikan, Christopher Dell, është takuar vetëm me kreun e PDK-së, Hashim Thaçin, atë të LDK-së, Isa Mustafa, ndërsa në këtë takim ishte edhe Behgjet Pacolli.

Shala me këtë rast ka thënë se ambasadori Dell ka ftuar adresat kryesor të problemeve. “Supozohet që ata që janë të ftuar, janë edhe adresat kryesore të problemeve që janë duke e pllakosur Kosovën”, ka thënë Shala, raporton Zëri.

Nënkryetari i AAK-së shprehet i bindur se aktualisht ekziston vullnet shumë i mirë që të arrihet një marrëveshje politike qe të dilet nga kriza.

“Tryeza e përbashkët do të mbahet nga institucionet e Kosovës dhe jam i bindur se brenda asaj tryeze do të arrihet dhe nënshkruhet marrëveshja”, ka thënë më tej Shala. Sipas tij, qëndrimi i AAK-së nuk ka ndryshuar, nuk do të jenë në seancë të Kuvendit pa pasur paraprakisht marrëveshje mes partive politike.