Kosova meriton udhërrëfyesin për vizat

Ministri i Punëve të Jashtme, Enver Hoxhaj, ka pritur një grup prej 11 diplomatësh të rinj francezë, të cilët po vizitojnë Kosovën të shoqëruar nga ambasadori i Francës në Kosovë, Jean- Francois Fitou.
Gjatë takimit, Hoxhaj ka veçuar aspiratat e qytetarëve të Kosovës, por edhe angazhimin maksimal të institucioneve të Republikës, në integrimin e vendit në strukturat euroatlantike. Ai ka thënë se Kosova po bën progres të madh në përmbushjen e standardeve evropiane në të gjitha lëmenjtë e jetës, po punon shumë në zhvillimin ekonomik të vendit dhe forcimin e të gjitha komponentëve shtetërorë.

Në këtë aspekt, ministri ka theksuar se Kosova e meriton të marrë sa më parë udhërrëfyesin për liberalizimin e vizave, duke e quajtur të padrejtë zgjatjen e mëtejshme të situatës kur kosovarët janë qytetarët e vetëm të rajonit, pa të drejtë udhëtimi pa viza në shtetet e Bashkimit Evropian.

Hoxhaj, po ashtu i ka njoftuar studentët me aspektet tjera të politikës së jashtme të Kosovës, prioritetet, strategjitë dhe rezultatet e pritura të diplomacisë kosovare. Ai i ka njoftuar se MPJ tashmë ka hartuar një strategji konkrete, gjithëpërfshirëse, për lobim në këtë aspekt, e cila, sipas ministrit, pritet të japë rezultate konkrete në rritjen e numrit të njohjeve për shtetin e Kosovës. /Telegrafi/