Buhler: Po mendohet për shkurtime tjera në KFOR

KFOR-i sapo ka përmbyllur procesin e shkurtimit. Në Kosovë tani veprojnë 5.500 ushtarë të KFOR-it. Kjo do të thotë se ky mision është bërë më fleksibil dhe më mobil në përgjegjësinë e tij. Kështu ka thënë komandanti i KFOR-it gjenerali gjerman Erhard Buehler në një intervistë për gazetën e Bundesverit gjerman “Aktuell”.

Buehler ka bërë të ditur se akoma pa u përmbyllur mirë ky proces, ka ide për shkurtime dhe reduktime të reja të trupave në Kosovë. Por ai ka shtuar se duhet parë se si do të funksionojë së pari kjo strukturë e reduktuar e KFOR-it dhe tek më pas të vendoset për një zvogëlim tjetër të numrit të ushtarëve.

“Reduktimi i mëtejmë varet edhe nga forcimi i vazhdueshëm i Policisë së Kosovës dhe FSK-së. Policia e Kosovës është një histori suksesi në Kosovë. Ata kanë bërë një kërcim të madh kualitativ sa i përket punës profesionale. Hapa të mëdhenj përparimi ka bërë edhe Forca e Sigurisë së Kosovës”, tha ai, transmetojnë mediat.

Gjenerali Buhler ka shtuar se vitin e ardhshëm FSK-ja do të arrijë nivelin përgatitor për veprime ushtarake. “Sapo kjo të arrihet, do të vendoset përfundimisht për profilin e FSK-së dhe të ardhmen e saj”, është shprehur Buhler.

Ai më tej ka thënë se KFOR-i vazhdon të ketë besimin e popullatës dhe shihet si një shtyllë e fortë e stabiliteti në vend, por krahas KFOR-it, besimi i popullatës po rritet edhe te forcat vetanake policore dhe ato të FSK-së.

Buhler është shprehur edhe për raportet e Kosovës dhe Serbisë. “Dialogu i filluar do të përfundojë me sukses”, ka thënë ai me optimizëm, duke shtuar se “të dyja vendet dëshirojnë të bëhen pjesë e Bashkimit Evropian dhe NATO-s. Kjo, ndërkaq, nuk arrihet me konflikte të pa zgjidhura”, tha komandanti i KFOR-it. /Telegrafi/