Jahjaga priti një delegacion të Grupit Parlamentar të PDK-së

Presidentja e Republikës së Kosovës, Atifete Jahjaga priti të mërkurën delegacionin e Grupit Parlamentar të Partisë Demokratike të Kosovës (PDK), të kryesuar nga shefi i grupit Adem Grabovci.

Delegacioni i PDK-së e përgëzoi Presidenten për zgjedhjen në krye të shtetit dhe i shprehu mbështetje të plotë. Anëtarët e këtij delegacioni e njoftuan Presidenten për punën që po bëhet në fusha të ndryshme në Kuvendin e Kosovës dhe në veçanti në proceset e reformës zgjedhore, si dhe ato të Kushtetutës, që ndërlidhen me zgjedhjen e Presidentit.

Bashkëkryesuesi i Komisionit për ndryshime të Kushtetutës, Arsim Bajrami e njoftoi Presidenten me punën e deritashme dhe shtroi nevojën që Presidentja të caktojë edhe një përfaqësues të saj, që do të ndiqte nga afër procesin e reformave të ligjit zgjedhor dhe të ndryshimeve të Kushtetutës.

Presidentja Jahjaga e vlerësoi kërkesën e Grupit Parlamentar të PDK-së për ta takuar dhe tha se takimet e këtilla janë në funksion të mirëkuptimit, respektimit të mandatit dhe të obligimeve kushtetuese dhe ligjore. /Telegrafi/