Prokurorët nga Mitrovica me program të ri

Gjatë një simpoziumi të mbajtur në Pejë, prokurorët e EULEX-it
dhe ata të Kosovës nga rajoni i Mitrovicës, u pajtuan të martën për
planet e reja. Prokurorët do të punojnë së bashku përmes aktiviteteve të
monitorimit, mentorimit dhe këshillimit (MMK).Sipas një
komunikate për media, të pranishëm në këtë simpozium ishin edhe
kryeprokurori i EULEX-it, Johannes van Vreeswijk dhe kryeprokurori i
Shtetit, Ismet Kabashi.
“Ky program i ri do të përmirësojë performancën, transparencën dhe
llogaridhënien e ndjekjeve penale sipas standardeve ndërkombëtare dhe
praktikave më të mira evropiane. Ka të bëjë me prokurorët e Kosovës që
kryejnë hetime të rasteve me ndihmën dhe mbështetjen e kolegëve nga
EULEX-i atëherë kur ka nevojë”, tha van Vreeswijk.
Nga ana e tij, kryeprokurori i Shtetit, Kabashi tha se prokurorët e
EULEX-it luajnë një rrol vendimtar kryesisht në lidhje me monitorimin,
mentorimin dhe këshillimin, duke përcjellë praktikat më të mira të
sistemeve të prokurorisë së vendeve nga vijnë.
“Për sa i përket rajonit të Mitrovicës, kur është fjala për fushën e
pushtetit ekzekutiv, EULEX duhet kryesisht të punoj në ekipe të
përziera. Puna në grup është mënyra më e mirë dhe më e suksesshme për të
ndërtuar një sistem transparent dhe të pavarur të prokurorisë”, tha
Kabashi. /Telegrafi/