Ende pa vendim për regjistrimin në veri

Ndonëse i paraparë për gjithë territorin e Kosovës, regjistrimi i
popullsisë nuk është zhvilluar në veri të vendit. Regjistrimi ishte
kundërshtuar nga serbët lokalë, të cilët kërkonin nga Qeveria e
Beogradit ose administrata e OKB-së ta realizonte procesin në fjalë.Pavarësisht thirrjeve të tyre, autoritetet kosovare shfaqin shpresën se regjistrimi së shpejti do të ndodhë edhe në veri.
Kryetari i Komisionit për Regjistrimin e Popullsisë, Rifat Blaku, i
pohon përpjekjet që po bëhen për gjetjen e një zgjidhjeje të duhur.
Sipas tij, hapat konkretë do të mund të definohen brenda pak ditësh.
“Shpresojmë se deri kah fundi i javës, do ta kemi një informatë
ekzakte për gjithë angazhimin që po bëhet nga të gjitha palët në proces -
UNOPS-i, Qeveria dhe EUROSTAT-i. Mund të ndodhin gjëra të
paparashikueshme, por shpresojmë se do të gjendet një zgjidhje”,
deklaroi Blaku për Radion Evropa e Lirë.
Procesi i rregullt i regjistrimit të popullsisë, ekonomive familjare
dhe banesave është zhvilluar nga data 1 prill deri më 15 të po këtij
muaji. Shtyrja e afatit prej katër ditësh nuk kishte bindur serbët që
t’i përgjigjen procesit.
Ish-ministrja e Administratës Publike, Melihate Tërmkolli, e sheh si
“problem serioz” këtë çështje. “Nëse regjistrimi në veri bëhet nga
ndonjë organizatë ndërkombëtare, çfarë është kërkesë e serbëve, procesi
nuk do të jetë i ligjshëm”, ka thënë Tërmkolli.
Përfaqësuesit ndërkombëtarë kanë pranuar se ambienti politik ka bërë
që në veri të mos realizohet regjistrimi. Ata po zhvillojnë takime me
përfaqësuesit e serbëve atje për të arritur ndonjë marrëveshje.
Serbët në veri kanë deklaruar në vazhdimësi se nuk do t’i përgjigjen
asnjë strategjie të institucioneve të Kosovës për regjistrimin e
popullsisë në këtë pjesë të vendit.
Në anën tjetër, rezultatet preliminare për procesin në tërësi pritet
të publikohen në fund të qershorit nga Enti i Statistikave të Kosovës
dhe Ministria e Administratës Publike. /Telegrafi/