Samiti Rusi-BE, bisedime për Kosovën

Në samitin e rregullt dy-vjetor, të 25-in me radhë, Rusi-BE, do të bisedohet edhe për çështjen e Kosovës, raporton shërbimi për shtyp nga Kremlini. Samiti do të mbahet në Rostov-on-Don, Rusi, të hënën dhe të martën.
Si Rusia ashtu edhe BE-ja janë të interesuara për zvogëlimin e numrit të zonave në krizë nëpër botë, thekson Moska, duke shtuar se shpesh kërkohet koordinim më i mirë në qasjen praktike për çështjet siç janë Kosova, apo konfliktet në rajonin e ish-Bashkimit Sovjetik.

“Dy palët janë duke i vazhduar përpjekjet në gjetjen e një zgjidhjeje të pranueshme dyanshëm që do të funksiononte për interesat e të palëve të përfshira si dhe në sigurinë evropiane në përgjithësi”, shkruan në deklaratën e Kremlinit.

Këtë vit, samiti dy-vjetor në qendrën administrative të Rostov Oblast është i pari i këtij lloji që kur Traktati i Lisbonës hyri në fuqi në vitin 2009, theksohet në deklaratë.

Në konferencë, delegacioni rus do të drejtohet nga presidenti i vendit, Dmitry Medvedev, ndërsa presidenti i Këshillit Evropian Herman Van Rompuy dhe presidenti i Komisionit Evropian, Jose Manuel Barroso, do ta përfaqësojnë Bashkimin Evropian. /Zëri/