Universitet indian në Kosovë, më i madhi në Ballkan

Sipas të gjitha gjasave Kosova do të bëhet edhe me një universitet të huaj, për të cilin madje thuhet se do të jetë më i madhi në Ballkan. Pas Indisë, Londrës dhe Kanadasë, ky universitet parasheh të hapet tash edhe në Kosovë, me ligjërues dhe ekspertë nga tri bendet e sipërpërmendura.
“IT, inxhinieri dhe mjekësi. Me laboratorë të shumtë të po këtyre fushave dhe hapësira marramendëse. Këtë do ta bëjnë disa biznesmenë nga India, të cilët në Londër dhe Kanada janë të specializuar për shkenca inxhinierike dhe mjekësore, dhe tash do investojnë edhe në arsimin e lartë në Kosovë”, thuhet në një njoftim të “Vizionit Indian për Kosovën”, që përbëhet nga një grup biznesmenësh indian, të interesuar për të investuar në vendin tonë.
Drejtori i universitetit, Shailesh Chaube ka kërkuar përkrahje institucionale që të krijojnë një kampus universitar, madje ka ofruar edhe mundësi të tjera bashkëpunimi në fushën e IT-së dhe sa i përket kurrikulumeve në arsimin e lartë publik, ku ky universitet dhe universitete tjera në botë, me të cilat ka bashkëpunim, mund të jepnin kontributin e tyre.
Ata janë takuar edhe me ministrin e Arsimit, Shkencës dhe Teknologjisë, Ramë Buja, i cili, duke shprehur gatishmëri bashkëpunimi për këtë, ka premtuar se nuk do të ketë procedura administrative të zgjatura, transmeton Indeksonline.
Por nuk ka lënë pa përmendur se adresa më e saktë është Agjencia e Akreditimit e Kosovës, duke qenë se tashmë Kosova e ka të rregulluar tregun e arsimit të lartë privat.
Biznesmenët nga India kanë vendosur të hapin universitetin në Kosovë të quajtur “Nëna Terezë”, ku do të përfshihen tri fusha të specializuara, inxhinierinë dhe mjekësinë, por edhe IT-në, fushë kjo për të cilën indianët njihen si më të mirët në botë.