Kosovës po i cenohet e drejta elementare për qarkullim të lirë

Nën organizimin dhe patronazhin e Institutit për Marrëdhënie
Ndërkombëtare të Hungarisë dhe Qendrës Ndërkombëtare për Demokraci
Tranzicion (ICDT) në Budapest të Hungarisë u mbajt tryezë lidhur me
gjendjen politike në Republikën e Kosovës me temë: Tri vjet pas
Pavarësisë - Ndërtimi i Besimit dhe Pajtimi në Kosovë.Në
këtë tryezë që për temë kishte gjendjen politike në Republikën e Kosovës
në njërin nga dy panelet e tryezës si panelit nga Kosova prezantoi edhe
Besnik Tahiri, drejtor i Institutit Kosovar për Qeverisje Lokale,
njëherësh anëtar i kryesisë së AAK-së.
Gjatë prezantimit të tij, Tahiri theksoi se me Kushtetutë, me ligjet
në fuqi, pa asnjë dyshim Republika e Kosovës është vendi më i avancuar
në rajon sa i përket ndërtimit të mekanizmave që mundësojnë ndërtimin e
besimit dhe integrimit të minoriteteve si në procesin e vendimmarrjes,
ashtu edhe në mbrojtjen dhe krijimin e mundësive për pakicat në Kosovë.
Tahiri theksoi se po ashtu se strukturat paralele të Beogradit zyrtar që
operojnë ilegalisht në Kosovë janë vetë ato që po e pengojnë integrimin
dhe po e dëmtojnë mirëbesimin ndërmjet komuniteteve.
Anëtari i kryesisë së AAK-së tha gjithashtu se shtetet që e kanë
njohur Kosovën duhet ta ndihmojnë atë në procesin e integrimit në
Unionin Evropian. Ai tha se mosnjohja nga pesë vendet e BE-së është duke
shkaktuar probleme për Kosovën si në agjendën e integrimit evropian,
ashtu edhe në zhvillimin dhe perspektivën evropiane. “Është e
papranueshme që Republika e Kosovës të jetë vendi i vetëm në rajon që
nuk mundë të lëvizë lirshëm, dhe se në këtë formë asaj po i cenohet e
drejta elementare për qarkullim të lirë”.
Presidenti i Qendrës Ndërkombëtare për Demokraci Tranzicion (ICDT),
ambasadori Istvan Guarmati ndër të tjera theksoi se Kosova si vend që ka
perspektivë evropiane duhet shumë më shumë t’i kushtoj rëndësi
implementimit të ligjeve në praktik dhe veprimeve në teren. Ai poashtu
theksoi se është me rëndësi që Kosova të krijoj një shtet me
institucione efektive dhe funksionale dhe në të njëjtën kohë të punojë
shumë në imazhin e vet ndërkombëtar, i cili sipas tij fatkeqësisht në
këtë situatë është i keq. /Telegrafi/