Shqipëri, prodhimet vendore ulin çmimet

Futja në treg e prodhimit vendas bujqësor ka ndikuar në uljen e
çmimeve. Në tregjet e shitjes me pakicë artikujt e sezonit kanë pësuar
rënie megjithëse për një pjesë të konsumatorëve, çmimet mbeten ende të
larta. “Është futur malli i vendit, komplet malli që tregtojmë është i
vendit, kjo ka bërë që edhe çmimet të bien”, thonë shitësit e
fruta-perimeve.Ndërsa konsumatorët nga ana e tyre deklarojnë
se përsëri çmimet janë të larta dhe të papërballueshme nga ana e tyre.
Por ndërsa në periudhën e verës tregjet furnizohen me prodhim vendas
bujqësor në pjesën tjetër të vitit konsumatorët ushqehen me produkte
importi.
Kryetari i Këshillit të Agrobiznesit Shqiptar Enver Ferizaj shpjegon
që qeveria duhet tu subvencionojnë fermerëve lëndën djegëse për serat,
me qëllim që të ketë prodhim vendas bujqësor gjatë gjithë vitit.
“Nuk i plotësojmë këto nevoja në periudhën e dimrit, pasi serat që i
kemi me ngrohje ato kanë një kosto me ngritjen e çmimit të naftës. Ato
pothuajse janë inaktive. Mendohej se duhet të bëjmë subvencionime për to
për sa i përket naftës”.
Drejtuesit e KASH-it theksojnë se në këtë sezon fermerët prodhojnë në
sasi të konsiderueshme jo vetëm për të furnizuar tregjet e brendshme
por edhe për eksport. /Telegrafi/