IPK ushtron përgjegjësi shtesë ndaj punonjësve të policisë

Në përputhje me Ligjin për Inspektoratin e Policisë së Kosovës
(IPK), ky inspektorat, si agjenci e pavarur ekzekutive brenda strukturës
së Ministrisë së Punëve të Brendshme (MPB), do të ushtrojë përgjegjësi
shtesë sa i përket ndjekjes penale ndaj punonjësve të Policisë së
Kosovës.Në një njoftime për media të MPB-së, thuhet se IPK,
si mekanizëm zbatues i ligjit, do të garantojë qytetarët se Policia e
Kosovës ushtron kompetencat e saj në përputhje me ligjin dhe standardet
më të avancuara ndërkombëtare dhe mbi të gjitha, të garantojë se po
respektohen të drejtat dhe liritë themelore të individit, të parapara
me Kushtetutën e Republikës së Kosovës dhe konventat ndërkombëtare.
“IPK, me qëllim të përmbushjes së mandatit ligjor dhe misionit të
vet, do të bashkëpunojë ngushtë me të gjithë qytetarët që janë
potencialisht viktima apo dëshmitarë të një sjellje jo të mirë të
punonjësve të Policisë së Kosovës”, thuhet në njoftim.
Në realizimin e objektivave strategjike, IPK-ja do të përmirësojë në
vazhdimësi mekanizmin e kontrollit të brendshëm të Policisë së Kosovës
dhe fton të gjithë qytetarët e Republikës së Kosovës për bashkëpunim. /Telegrafi/