Kërkon nga veteranët ta ndërpresin grevën

Kryetari i Kuvendit të Kosovës, Jakup Krasniqi ka vizituar në ditën e dymbëdhjetë të grevës veteranët e Ushtrisë Çlirimtare të Kosovës, me ç’rast u ka kërkuar atyre ta ndërpresin grevën, duke iu premtuar se sapo të arrijë Ligji për vlerat e luftës në Kuvend, do të procedohet dhe do të miratohet sa më shpejt që të jetë e mundur.

Krasniqi është shoqëruar edhe nga nënkryetari i Kuvendit, Glauk Konjufca dhe deputeti i Aleancës për Ardhmërinë e Kosovës, Ahmet Isufi.

Kreu i Kuvendit ka shprehur mirënjohjet për kontributin që kanë dhënë ish luftëtarët e Ushtrisë Çlirimtarët e Kosovës për lirinë dhe pavarësinë e vendit, ndërkaq u ka bërë të ditur veteranëve se Ligji për vlerat e luftës nuk ka ardhur ende në Kuvend nga Qeveria.

Një vizitë të tillë, delegacioni i Kuvendit e ka bërë pak para fillimit të seancës plenare, në të cilën po ashtu është ngritur çështja e grevës së veteranëve të UÇK-së. /Telegrafi/