Jahjaga dhe Thaçi në drekë pune

Presidentja Atifete Jahjaga dhe kryeministri Hashim Thaçi kanë
patur të mërkurën një drekë punë në restorantin “Tiffany” në Prishtinë,
ku kanë diskutuar për zhvillimet aktuale politike në vend, për procesin e
njohjeve të reja për shtetin e Kosovës dhe për aspekte të tjera të
politikave zhvillimore dhe integruese të vendit.Gjatë
takimit, kryeministri Thaçi ka ritheksuar vullnetin dhe përgjegjësinë e
plotë institucionale dhe politike për të thelluar edhe më tej
bashkëpunimin e shkëlqyer me presidenten Jahjaga, në funksion të
avancimit të proceseve demokratike të vendit.
Sipas një njoftimit të Zyrës së Kryeministrit, Thaçi ka theksuar se
pas aprovimit nga Qeveria të Strategjisë për përmbylljen e procesit të
njohjeve, do të rritet koordinimi mes Qeverisë, Presidencës, Kuvendit,
shoqërisë civile dhe procesi i njohjeve të reja do ta ketë rrjedhën e
vet edhe më rezultative.
Kryeministri Thaçi dhe presidentja Jahjaga janë pajtuar që të
vazhdohet puna e të gjitha institucioneve të Kosovës në përmbushjen e
plotë të kritereve dhe standardeve evropiane, në kuadër të agjendës
evropiane të vendit. /Telegrafi/