Ipeshkvi Gjergji thërret të shmangen mashtrimet

Për nder të festës së kishës katolike “Shën Ndou” në Prishtinë,
besimtarët e fesë katolike, të hënën kanë mbajtur një meshë, duke u
lutur para Zotit, që për të gjithë të mbretërojë paqja dhe dashuria.Me
këtë rast ipeshkvi i Kosovës, Imzot Dodë Gjergji, duke ju drejtuar me
një fjalë këtyre besimtarëve ka thënë të gjithë po jetojnë në një botë
ku rrena dhe mashtrimi po mbisundojnë, andaj ka kërkuar nga ta që të
largohen nga to dhe të mbesin besnikë të vetvetes, kombit, familjes dhe
ndaj çdo gjëje të drejtë.
Festa ka filluar me Meshën e Shenjtë, ndërsa edhe pse është pritur të
marrin pjesë presidentja e Kosovës, Atifete Jahjaga, shefi i EULEX-it
dhe gjenerali i KFOR-it, ata kanë munguar. Të vetmit që kanë qenë
prezentë kanë qenë ambasadori italian, Michael Giffoni, dhe
zëvendëskomandanti i KFOR-it, gjeneral Marko Seronha, njofton
KosovaPress.
Duke folur për kishën “Shën Ndou”, ipeshkvi Dodë Gjergji ka
falënderuar Zotin për iniciativa, të cilat në kohë të vështira kanë
lindur dhe kanë dal prej kësaj kishe dhe njëkohësisht ka falënderuar të
gjithë ata që kanë dhënë kontribut që sot të gëzohet kjo ditë.
Ipeshkvi Dodë Gjergji ka theksuar se të gjithë po jetojmë në një botë
ku zotësi është bërë mashtrimi dhe gënjeshtrat, por ai ka kërkuar nga
të gjithë të krishterët që të largohen nga kjo dhe së pari të jenë
besnikë ndaj vetvetes dhe të gjithë të tjerëve. /Telegrafi/