Certifikohen noterët e parë

Themelimi i noterisë do t’u ndihmojë qytetarëve të Kosovës në
çështjet ligjore, ndërkaq në të njëjtën kohë do t’u lehtësohet puna edhe
gjykatave në vend u tha të hënën, me rastin e certifikimit të dhjetë
noterëve të parë. Kryeministri i vendit, Hashim Thaçi tha se
pas një rruge të gjatë, e që nuk ka qenë fare e lehtë, po
funksionalizohet veprimtaria e noterisë.
“Siç e dini, ideja për themelimin e noterisë si veprimtari publike
është shfaqur jo fort vonë, për të ndihmuar edhe përmirësuar shërbimin
ndaj qytetarëve tanë, me qëllim të vazhdueshëm në përmirësimin e
kualitetit të jetës së tyre në fusha të ndryshme – e në këtë rast në
drejtësi. Andaj, noterinë e themeluam për të ndihmuar qytetarët tanë në
dy dimensione: duke ua lehtësuar atyre punën me çështje ligjore, dhe në
të njëjtën kohë duke pasur për qëllim që të lehtësohen Gjykatat tona të
rregullta nga një numër i stërmadh lëndësh”, u shpreh Thaçi.
Ndërkaq, për kryesuesin e Këshillit Gjyqësor të Kosovës, Enver Peci
certifikimi i dhjetë noterëve të parë paraqet një ngjarje tejet të
rëndësishme për sistemin juridik në vend, pasi që është një proces që
hyn në kuadër të reformimit rrënjësor të sistemit të gjyqësor të
Kosovës..
Themelimi i noterisë dhe licencimi i dhjetë noterëve të parë është
mbështetur nga Zyra Zvicerane në Kosovë, nga USAID-i dhe nga partnerë të
tjerë, ndërkaq jetësimi i këtij sistemi pritet të fillojë nga 1 janari i
vitit 2012. /Telegrafi/