Ramiqi: Thaçi na ka premtuar xhami

Fuad Ramiqi po kërkon nga kryeministri Hashim Thaçi që ta mbajë
një premtim të dhënë gjatë fushatës: ndërtimin e një xhamie të madhe në
Prishtinë.Përfaqësuesi i një lëvizjeje të quajtur
“Bashkohu”, e cila ka marrë përsipër organizimin e protestave për
ndërtimin e një xhamie në qendër të Prishtinës, ka thënë se kryeministri
i vendit e kishte dhënë këtë premtim.
“Kryeministri e ka dhënë premtimin para fushatës dhe gjatë fushatës
elektorale që do ta ndërtojë xhaminë dhe do t’i plotësojë kërkesat e
xhematit për një xhami në Prishtinë”, ka thënë Ramiqi në një konferencë
për media të mbajtur para Xhamisë së Madhe në Prishtinë. Premtim të
njëjtë kanë bërë thuajse të gjitha partitë, sipas Ramiqit.
“Edhe kryeministri, edhe kryetari i Komunës dhe të gjitha partitë që
kanë bërë fushatë kanë thënë se do ta bëjmë këtë punë”, ka thënë ai.
Gazeta ka provuar të martën pasdite që të marrë një prononcim nga
zyrtarët qeveritarë të PDK-së për të mësuar nëse u ka premtuar
kryeministri Thaçi xhami besimtarëve, por nuk ia ka dalë, shkruan Koha.
Zëvendëskryeministri Hajredin Kuçi dhe ministrat Memli Krasniqi e
Blerand Stavileci nuk e kanë hapur telefonin.
Ish-anëtari i Lidhjes Demokratike të Kosovës ka paralajmëruar që të
premten do të bllokohet sërish rruga në udhëkryqin tek Xhamia e Çarshinë
në shenjë proteste për mosndarjen e një trualli në qendër që për
protestuesit do të ishte para Fakultetit të Filologjisë. Ai ka thënë se
nuk ka kërkuar leje nga Policia për bllokimin e rrugës, por vetëm do t’i
njoftojnë për këtë bllokim që pritet të ndodhë për herë të tretë këtë
muaj. /Telegrafi/