Veriu për BE-në

Shefi i ICO-së, Pieter Feith tha se në muajt e ardhshëm rolin kryesor rreth situatës në pjesën veriore do ta marrë Brukseli. Ai foli për mundësinë e kushtëzimit të kandidaturës së Serbisë për anëtarësim në BE me përmirësimin e gjendjes në Veri. Edhe Kryeministri Thaçi pret qasje më “proaktive” ndaj kësaj pjese të vendit.

Deklaratat e Nënsekretarit Amerikan të Shtetit për Çështje Politike, William Burns në Samitin e Kroacisë, javën e kaluar, rreth mundësisë së kushtëzimit të kandidaturës së Serbisë në fund të vitit me progresin në dialog dhe çështjen e Veriut, janë reflektuar edhe në takimin e Grupit Drejtues Ndërkombëtar (ISG) të martën në Prishtinë.

Në fakt, një qasje të ngjashme me atë të diplomatit amerikan e ka prezantuar shefi i ICO-së, Pieter Feith gjatë konferencës për media me Kryeministrin Thaçi, shkruan Express.

“Kah fundi i vitit, kur në Bruksel shtetet anëtare të BE-së do të diskutojnë progresin në dialog, kur të ketë diskutim rreth aplikacionit të Serbisë për anëtarësim, ekziston një pritje se çështja e Kosovës do të jetë pjesë e këtij diskutimi se nëse Serbia dëshiron të lëvizë përpara, duhet të ketë një marrëveshje që është konstruktive për rajonin dhe që do të na ndihmojë edhe sa i përket Veriut”, ka thënë Feith.

Grupi Ndërkombëtar Drejtues, një mekanizëm mbikëqyrës i pavarësisë së Kosovës që përbëhet nga 27 shtete që e kanë njohur pavarësinë e Kosovës, sipas Feithit, ka një qëndrim të qartë rreth pjesës ku kontrollin e kanë struktura të sponsorizuara nga Serbia.

“Ka pajtueshmëri brenda ISG-së se nuk do të ketë ndarje, kjo nënkupton se veriu do të mbetet në Kosovë, se nuk do të ketë dhunë dhe se po ashtu Veriu nuk do të mbetet konflikt i ngrirë”, ka thënë Përfaqësuesi Civil Ndërkombëtar. /Telegrafi/