Korac: Serbia është peng i radikalëve të Mitrovicës

Kryetari i Unionit Socialdemokrat (SDU), Zarko Korac, ka thënë se Serbia nuk mundet gjithmonë të jetë peng i radikalëve politik të Mitrovicës dhe i kontrabanduesve të të dy anëve të kufirit.

“Serbia duhet inkurajojë serbët e veriut të Kosovës të nisin dialogun politik me Prishtinën dhe të kërkojë respektimin e Planit Ahtisaari që parasheh një lloj autonomie për veriun e Kosovës”, ka thënë Korac në një shkrim autorial në ditoren e Novi Sadit, “Dnevnik”.

Sipas tij, Serbia duhet të niset nga e “e vërteta e hidhur” se shtetet kryesore të BE-së e kanë pranuar pavarësinë e Kosovës, si dhe nga e vërteta se Serbia nuk ka asnjë kompetencë në Kosovë dhe se kjo më nuk do të ndryshoj.

“Serbia ka të drejtë legjitime dhe obligim që të interesohet për të drejtat qytetare dhe njerëzore të serbëve në Kosovë dhe për mirëqenien e tyre”, ka thënë Korac, duke bërë me dij se Serbia nuk mundet ta injorojë faktin se gjendja e ngrirë në veri është çështje e së kaluarës.

“Injorimi i këtij fakti do ta shpie Serbinë në qorrsokakun e zhvillimit evropian”, ka thënë Korac, duke shtuar se Serbia duhet të formulojë një politikë të re kundrejt Kosovës. /Telegrafi/