EULEX-i sërish në veri

Pjesëtarët e policisë së EULEX-it kanë hyrë sot rreth orës 14 në motelin “Aleksandrija”, në Zupç të Zubin Potokut, njoftojnë mediat e Beogradit.

Mediat theksojnë se pronari i këtij lokali është një serb. Ato shtojnë se aksioni është “një prej serive të futjes nëpër shtëpi dhe objekte në veri të Kosovës, pas aksionit të nisur dje nga EULEX-i për arrestimin e autorëve të vrasjes së pjesëtarit të Policisë Speciale të Kosovës, ROSU”.

Më herët, forcat e KFOR-it kanë bllokuar rrugën kryesore magjistrale në pjesën ndërmjet Uglarit e Zubin Potokut, citon “Blici” burime anonime nga Zubin-Potoku, transmeton “koha.net”.

“KFOR-i erdhi sigurisht me njëqind automjete, askush s’guxon të lëvizë, as në drejtim të Mitrovicës, as në drejtimin tjetër. Nuk respektojnë as këmbësorët, as automjetet. Qëndrojmë para shtëpive tona dhe shikojmë. Ka më shumë ushtarë se vendës”, citon “Blic” burimin.

Edhe “RTS” njoftoi se forcat e EULEX-it e të KFOR-it bllokuan për një orë të gjitha rrugët magjistrale Mitrovicë-Ribariq, në kërkim të autorëve të vrasjes së policit të ROSU si dhe për bastisjen e hotelit “Aleksandria”. “RTS” citon pronarin të ketë thënë se pjesëtarët e EULEX-it “kishin qenë të matur dhe se ishin larguar pas bastisjes”.

Në fshat tani është qetësi.

Zëdhënësi i Policisë së kosovës, Besim Hoti, i tha agjencisë “FoNet” se Policia e Kosovës është e informuar për aksionin e KFOR-it e të EULEX-it në Zubin Potok, por ajo nuk ka marrë pjesë në të. /Telegrafi/