Shpërthimi i dhunës në veri të Kosovës në fund të korrikut la një polic të vrarë dhe shumë civilë të plagosur. Kancelarja gjermane, Angela Merkel, u përgjigj ndaj përleshjeve duke thënë se Bashkimi Evropian besonte se ngjarje e tilla i përkisnin të kaluarës. Disa javë më vonë, ajo e shtoi edhe më shumë presionin, duke i bërë thirrje Beogradit të suprimojë institucionet e saj në veriun e Kosovës dhe të lejonte EULEX-in të vepronte lirisht atje. Ishte kjo hera e parë që serbët dëgjonin këto kushte.
Presidenti serb Boris Tadic tha se Beogradi nuk do t’i suprimojë institucionet e tij në veriun e Kosovës. Ai tha se Serbia është e hapur ndaj misionit të Bashkimit Evropian në gjithë territorin dhe se ka mjaft vend për kompromis. Por, ai pranoi gjithashtu për herë të parë se ekziston mundësia që Serbia të mos e fitojë statusin e kandidatit në Bashkimin Evropian këtë vit.
Udhëheqësit serbë e kanë të qartë se Beogradit nuk i kërkohet të njohë zyrtarisht pavarësinë e Kosovës, por të normalizojë marrëdhëniet me të. Por, shumë i shikojnë këto kërkesa si njohje de-facto, diçka që politikanët serbë besojnë se të zgjedhurit e tyre nuk do ta pranonin kurrë.
Bosko Jaksiq, analist i gazetës serbe “Politika”, thotë se Serbia e ka humbur tashmë Kosovën. Ai thotë se politikanët serbë kanë frikë se po të tradhtojnë bazën e tyre nacionaliste, gjë që do t’u kushtojë në zgjedhjet e ardhshme.
“Shumica e serbëve po e kuptojnë se Kosova nuk është më Serbi dhe për mendimin tim politikanët nuk janë budallenj që të mos e kuptojnë këtë”, ka thënë Jaksiq, raporton “VOA”.
Kancelarja Merkel ishte të martën në Slloveni, ku gazetarët thanë se ajo e kishte zbutur qëndrimin e saj, duke thënë se në Kosovë mund të ndiqet një praktikë graduale. Por, anëtarja e Parlamentit Evropian, Doris Pack, i tha “Zërit të Amerikës” se Bashkimi Evropian nuk mund të pranojë një vend në konflikt me fqinjin e tij. Ndaj, Beogradi duhet patjetër të tregojë se është serioz rreth avancimit në negociatat me Kosovën.
“Ne duam prova që ata janë të predispozuar për këtë”, ka thënë Pack. /Telegrafi/