Krasniqi: Kosova ka shënuar progres viteve të fundit

Kryetari i Kuvendit të Kosovës, Jakup Krasniqi me rastin e 15 shtatorit, Ditës Ndërkombëtare të Demokracisë ka thënë se Kosova ka shënuar progres viteve të fundit në zhvillimin dhe promovimin e demokracisë.

Sipas tij, Kosova u është bashkuar shteteve demokratike të botës, duke kremtuar Ditën Ndërkombëtare të Demokracisë, përderisa ka thënë se festimi i kësaj dite, tregon se ky është një rast i mirë për t’iu folur fëmijëve për vlerat demokratike të shoqërisë së Kosovës.

“Megjithatë, funksionimi dhe avancimi i demokracisë është i pamundshëm pa pjesëmarrjen aktive të qytetarëve në zgjedhjen e përfaqësuesve të dëshmuar me veprimet e tyre dhe në kultivimin e frymës së tolerancës, solidaritetit dhe mirëkuptimit. Andaj të gjithë bashkë duhet të marrim përgjegjësinë për avancimin dhe funksionimin e demokracisë në vend”, ka thënë Krasniqi.

Përfaqësuesi i NDI-së, Robert Benjamin ka vlerësuar me këtë rast se demokracia në Kosovë nga viti 1999 është zhvilluar në mënyrë impenjuese. Ai ka vënë në dukje nevojën për demokratizimin më të madh të partive politike në vend, duke thënë se duhet të hapen për pjesëmarrjen e njerëzve.

Me rastin e shënimit të kësaj dite, NDI ka dhuruar një donacion të përbërë nga pajisje audiovizuele për këndin e mediave në Kuvendin e Kosovës.

Dita Ndërkombëtare e Demokracisë lidhet me Deklaratën e Përgjithshme për Demokraci të Unionit Ndërparlamentar, miratuar më 15 shtator 1997 në Kajro dhe me Rezolutën për Demokraci, të miratuar dhjetë vjet më vonë, më 13 dhjetor 2007 nga Asambleja e Përgjithshme e Organizatës së Kombeve të Bashkuara.

Gjatë gjithë ditës së sotme, deri në orën 16.00, qytetarët do të kenë mundësinë të vizitojnë Kuvendin, të përcjellin drejtpërdrejt punën e Kuvendit, në të aktivitetin “Dyert e hapura të Kuvendit” dhe në “Panairin e OJQ-ve”. /Telegrafi/