MPB serbe ndalon tubimin e ultranacionalistëve

Ministria serbe e Punëve të Brendshme ka ndaluar tubimin e ultranacionalistëve serbë në qytetin e Rashkës, në kufi me Kosovën, të cilin e ka udhëhequr Mirko Jovic, në emër të Këshillit Kombëtar serb.

Nga MPB serbe thuhet se pjesëmarrësve nuk u është lejuar tubimi, sepse nuk është dorëzuar kërkesa në bazë të ligjit- pesë ditë më herët.

Tubimi ishte caktuar për orën 11:30 të shtunën, në Rashkë, prej ku pjesëmarrësit kanë pasur për qëllim të shkojnë në pikëkalimin kufitar në Rudnicë.

Sipas mediave serbe, njëri nga pjesëmarrësit në këtë tubim është pritur të jetë edhe ish-peshkopi Artemije, i cili u shkarkua dhe është në proces gjyqësor për shkak të keqpërdorimit të fondeve. /Telegrafi/