Kelmendi nuk lëviz nga Kelmendi

Zyrtarë të Komunës së Mitrovicës kanë vizituar të dielën familjen e Tahir Kelmendit, në fshatin Kelmend të Zveçanit, jo larg vendit ku serbët kanë barrikaduar rrugën.

Bllokadat e rrugëve, një nga të cilat është ngritur në afërsi të rrugës që lidh fshatrat Kelmend, Boletin dhe Zhazhë, ka krijuar probleme për të gjithë qytetarët shqiptarë që jetojnë në veri.

“Pjekuria e treguar e qytetarëve të veriut, të cilët vazhdimisht kanë qenë të provokuar nga strukturat paralele serbe, kanë bërë që të dal në shesh e vërteta për politikën kriminale të Beogradit në këtë pjesë të Kosovës”, ka thënë Behxhet Bala, drejtor i Drejtorisë për Mbrojtje dhe Shpëtim.

Kelmendi e shfrytëzon për qarkullim rrugën që kalon nëpër Rudare. Ndaj, për të tash rëndësi ka rregullimi i rrugës që shpie në fshatin Boletin.

“Në anën e poshtme të vendit, ku gjendet shtëpia ime, janë 16 shtëpi të serbëve. Zakonisht qarkullojmë në rrugën mes tyre, por pos ndonjë provokimi nuk kemi pasur ndonjë telashe të madhe. Tash e kanë bllokuar rrugën dhe s’po mundemi të lëvizim andej”, ka thënë Kelmendi, i cili nuk e ka asnjë fqinj shqiptarë afër.

“Këtu e kam pasur shtëpinë para luftës. Në luftë ma kanë djegur, por e kam rindërtuar dhe nuk e kam ndërmend të lëvizi. Është vendi dhe shtëpia ime kjo”. /Telegrafi/